ભારત સરકાર દ્વારા ડીજીટલ પબ્લિક ઈન્ફાસ્ટ્રકચરના ભાગરૂપે એગ્રિસ્ટેક પ્રોજેકટ અમલમાં મુકવામાં આવેલો છે. જે અંતર્ગત જેમના પણ નામ ૭/૧૨, ૮ અ માં હોય એ તમામ ખેડૂત ખાતેદારોને ફાર્મર રજીસ્ટ્રી (ખેડૂત નોંધણી) કરાવવી ફરજીયાત કરવામાં આવેલી છે. ભારત સરકાર દ્વારા પી.એમ.કિસાન યોજનાના આગામી ૨૦મા હપ્તાનો લાભ મેળવવા તમામ ખેડૂતો માટે ફાર્મર રજીસ્ટ્રી ફરજીયાત કરવામાં આવેલી છે. તાપી જીલ્લામાં પી.એમ. કિસાન યોજનામાં લાભ મેળવી રહેલા લાભાર્થીઓ પૈકી ૨૦,૧૭૪ ખેડૂતોએ ફાર્મર રજીસ્ટ્રીની કાર્યવાહી પૂર્ણ કરેલી નથી.
20મો હપ્તો ટૂંક સમયમાં રીલીઝ થશે
પ્રધાનમંત્રી કિસાન સમ્માન નિધિ યોજનાનો આગામી ૨૦મો હપ્તો ટૂંક સમયમાં રીલીઝ થનાર હોય જે ખેડૂતોની ખેડૂત નોંધણી બાકી છે તેઓએ સત્વરે નોંધણી કરાવવી આવશ્યક છે. ખેડૂત નોંધણી માટે બાકી રહેલા ખેડૂતો જલ્દી ફાર્મર રજિસ્ટ્રીમાં નોંધણી કરાવી શકે તે માટે અત્યારે ગ્રામ્ય કક્ષાએ ઝુંબેશ સ્વરૂપે નોંધણી કરવામાં આવી રહી છે. આથી તમામ બાકી ખેડૂતોને જે તે ગામના વી.સી.ઈ., સી.એસ.સી. સેન્ટર, ગ્રામસેવક,તલાટી કમ મંત્રીનો સંપર્ક કરી તાત્કાલિક ખેડૂત નોંધણી કરાવી લેવા ખાસ અનુરોધ કરવામાં આવે છે.
કેવી રીતે રજીસ્ટ્રેશન કરાવી શકાય ?
ખેડૂતો gjfr.agristack.gov.in/farmer-registry-gj/#/ વેબસાઈટ પર જઈ સેલ્ફ રજીસ્ટ્રેશન દ્વારા અથવા નજીકના સી.એસ.સી (કોમ્પ્યુટર સહાયતા કેન્દ્ર) પર જઈ ફાર્મર રજીસ્ટ્રી કરાવી શકે છે. આ માટે તમામ ખેડૂતોએ (૧) આધાર કાર્ડ (૨) જમીનના ઉતારાની નકલ-૮અ/૭-૧૨ તેમજ (૩) આધાર કાર્ડ લીંક હોય તે મોબાઇલ સાથે રાખવો ખાસ જરૂરી છે. દસ્તાવેજોની નકલ કોઈ પણ ઓપરેટરને આપવાની રહેતી નથી. ફકત ફાર્મર રજીસ્ટ્રી માટે જરૂરી વિગતો ઓપરેટરને જણાવવાની રહે છે. એમ જિલ્લા ખેતીવાડી અધિકારીની અખબારી યાદીમાં જણાવાયું છે.
