આજકાલ અમેરિકાના રાષ્ટ્રપ્રમુખ ડોનાલ્ડ ટ્રમ્પ ખૂબ ચર્ચામાં છે. NATOના સાથી દેશોને રશિયા પાસેથી ક્રૂડ ઓઈલ ખીરદાવનું બંધ કરવાની માંગ કરી છે. જોકે તેમ છતાં હંગેરીએ અમેરિકાને સીધો પડકાર આપી કહ્યું છે કે, તેઓ રશિયા પાસેથી તેલ ખરીદવાનું ચાલુ રાખશે. હંગેરીના વિદેશ મંત્રી પીટર સિજ્જાર્ટોએ કહ્યું છે કે, તેમનો દેશ રશિયા પાસેથી તેલ ખરીદવાનું બંધ નહીં કરે. તેમણે UNGAની વાર્ષિક બેઠકમાં કહ્યું કે, ‘અમારા દેશને રશિયાનું ક્રૂડ ઓઈલ અને ગેસ જેવા સ્ત્રો ખૂબ જરૂરી છે, તેથી અમે અમારા ઊર્જા ઉત્પાદનના પુરવઠા માટે આ ખરીદી ચાલુ રાખીશું.
રશિયા પાસેથી ઓઈલ ખરીદી કરવા સિવાય અન્ય વિકલ્પ નથી
સિજ્જાર્ટોએ સ્પષ્ટ કહ્યું છે કે, ‘અમારા દેશ માટે ઊર્જા પૂરવઠો એક મહત્ત્વનો મુદ્દો છે. રશિયા સિવાય અન્ય દેશો પાસેથી ખરીદી કરવાનું સપનું જોવું સારું છે, પરંતુ અમે માત્ર તે દેશ પાસેથી ખરીદી શકીએ છીએ, જ્યાં માળખાકીય સુવિધાઓ છે. હંગેરીના વડાપ્રધાન વિક્ટર ઓર્બાન ટ્રમ્પના સૌથી નજીકના સાથી છે અને તેઓ હંમેશા તેમની પ્રશંસા કરતા રહ્યા છે. આ ઉપરાંત તેમના રશિયા સાથે પણ મિત્રતાભર્યા સંબંધો જાળવી રાખી યુક્રેનની ટીકા કરતા રહ્યા છે.
ટ્રમ્પના નિવેદન બાદ કેટલાક નાટો દેશોમાં મતભેદ જોવા મળ્યા છે. ટ્રમ્પના વધુ એક નજીકના સાથી અને યુક્રેનના સમર્થક લિન્ડસે ગ્રેહામે લખ્યું કે, ‘રશિયન તેલ ખરીદવાની વાત છે, તો તે હંગેરી અને સ્લોવાકિયા પર નિર્ભર છે. મને આશા છે કે તેઓ જલ્દી જ આ યુદ્ધ સમાપ્ત કરવામાં અમારી મદદ કરવા આગળ આવશે.
