તાપી જિલ્લામાં સ્થાનિક સ્વરાજ્યની સામાન્ય ચૂંટણી-૨૦૨૬ને અનુલક્ષીને જિલ્લા વહીવટી તંત્ર દ્વારા તૈયારીઓ ચાલી રહી છે. ઉમેદવારી પત્રો ભરવાથી લઈને તેની ચકાસણી અને ઉમેદવારી પાછી ખેંચવાની પ્રક્રિયા પૂર્ણ થઇ છે. તાપી જિલ્લા પંચાયતની ૨૬ બેઠકો માટે ભારતીય જનતા પાર્ટીના ૨૬, ભારતીય રાષ્ટ્રીય કોંગ્રેસના ૨૬, આમ આદમી પાર્ટીના ૨૪ અને અપક્ષ/અન્ય પક્ષના ૦૧ ઉમેદવાર મળી કુલ ૭૭ ઉમેદવારોએ ઉમેદવારી નોંધાવતા ચૂંટણી પ્રક્રિયા હાથ ધરાશે.
ઉમેદવારોમાં ૨૪ વર્ષના યુવા થી લઈને ૭૦ વર્ષના વડીલ સુધીના વિવિધ વયજૂથના ઉમેદવારો મેદાનમાં છે, જે અનુભવ અને ઉત્સાહના અનોખા મિશ્રણને પ્રતિબિંબિત કરે છે. વધુમાં, લોકશાહીના આ પર્વમાં નારી શક્તિનું પ્રતિનિધિત્વ પણ પુરૂષ સમોવડું જોવા મળી રહ્યું છે. જિલ્લા ચૂંટણી અધિકારી અને કલેક્ટર ડૉ. વિપિન ગર્ગના માર્ગદર્શન હેઠળ સમગ્ર જિલ્લામાં આદર્શ આચારસંહિતાનું ચુસ્તપણે અમલીકરણ કરવામાં આવી રહ્યું છે.
૮ તાલુકા પંચાયતની કુલ ૧૩૪ બેઠકો માટે કુલ ૩૮૩ ઉમેદવારો વચ્ચે ચૂંટણી:-
તાપી જિલ્લાના આઠ તાલુકા પંચાયતની કુલ ૧૩૪ બેઠકો માટે કુલ ૩૮૩ ઉમેદવારો વચ્ચે ચૂંટણી યોજાશે. તાપી જિલ્લાના નવનિર્મિત ઉકાઈ તાલુકા માટે આ પ્રથમ સામાન્ય ચૂંટણી છે, જ્યાં ઉકાઈની ૧૬ બેઠકો માટે ૫૦ ઉમેદવારો ચૂંટણી મેદાનમાં છે. સ્થાનિક મતદારોમાં પણ પોતાના નવા તાલુકાના પ્રથમ પ્રતિનિધિઓ પસંદ કરવા માટે અનેરો થનગનાટ જોવા મળી રહ્યો છે.
ખાસ કરીને જિલ્લાની તમામ તાલુકાના ૧૩૪ બેઠકો પર મહિલા ઉમેદવારોનું વર્ચસ્વ નોંધપાત્ર છે. જિલ્લા ચૂંટણી અધિકારી અને કલેક્ટર ડૉ. વિપિન ગર્ગના સીધા માર્ગદર્શન હેઠળ તાપી જિલ્લાનું વહીવટી તંત્ર સજ્જ બન્યું છે.
મોડી રાત્રે મળેલ વિગતો તરફ એક નજર કરીએ તો નિઝર – ૧૬ બેઠકો માટે ૪૪ ઉમેદવારો પૈકી સરવાળા બેઠક ઉપર ભાજપના એક જ ઉમેદવાર હોવાથી બિનહરીફ જાહેર, ડોલવણ- ૧૬ બેઠકો માટે ૪૫ ઉમેદવારો,સોનગઢ-૧૮ બેઠકો માટે ૫૨ (બાવન) ઉમેદવારો, વ્યારા-૨૦ બેઠકો માટે ૬૦ ઉમેદવારો, વાલોડ-૧૬ બેઠકો માટે ૪૯ ઉમેદવારો, નવનિર્મિત ઉકાઈ તાલુકાની ૧૬ બેઠકો માટે ૫૦ ઉમેદવારો, ઉચ્છલ-૧૬ બેઠકો માટે ૪૭ ઉમેદવારો તેમજ વેબ સાઈટ ઉપર કુકરમુંડા તાલુકાની વિગતો અનુસાર ૧૬ બેઠકો માટે ૩૬ ઉમેદવારો વચ્ચે ચૂંટણી યોજાશે.
