વિવાદિત માંડળ ટોલનાકા પાસેથી તાપી LCBએ આઈશર ટેમ્પામાંથી અંદાજે રૂપિયા 71.68 લાખના વિદેશી દારૂ સાથે રાજસ્થાનના ડ્રાઈવરને ઝડપી પાડી જેલના સળિયા ગણતો કરી દીધો છે. તમને નવાઈ લાગશે કે, આરોપીએ દારૂના જથ્થાના છુપાવવા માટે આઈશર ટેમ્પામાં લોખંડનું ખાસ બોક્સ બનાવ્યું હતું અને તેમાં વિદેશી દારૂની હેરાફેરી શરૂ કરી હતી. તાપી જિલ્લા એલસીબીનો સ્ટાફ સોનગઢ તરફ પેટ્રોલિંગમાં હતો, ત્યારે પોલીસકર્મી બીપીન રમેશ અને લેબજી પરબતજીને બાતમી મળી હતી કે, એક આઈશર ટેમ્પામાં વિદેશી દારૂ ભર્યો છે અને તે આઈશર ટેમ્પો માંડળ ટોલનાકા પાસેથી પસાર થવાનો તેવી ચોક્કસ માહિતી મળી હતી. જે બાદ પીઆઇ ડી.એસ.ગોહિલના માર્ગદર્શન હેઠળ વોચ ગોઠવવામાં આવી હતી. બુધવારે નવાપુર તરફથી આવેલા આઈશર ટેમ્પો GJ-23-AT-9598ને અટકાવી તપાસ કરતા ડ્રાઈવરે ટેમ્પોમાં વોટર કૂલિંગ મશીન ભર્યું હોવાનું જણાવ્યું હતું.
LCBની બાજ નજરથી આરોપી બચી ન શક્યો:-
જોકે તાપી LCBના સ્ટાફને શંકા જતા ટેમ્પામાં મૂકવામાં આવેલા પતરાના એક મોટા બોક્સને કાપીને તપાસ કરવામાં આવતાં તેમાંથી પાસ-પરમિટ વગરની વિદેશી દારૂની કુલ 20,496 બોટલ કે જેની અંદાજે કિંમત 71,68,080 થાય છે, તે મળી આવતા LCBનો સ્ટાફ પણ વિચારમાં પડી ગયો હતો. બાદમાં પોલીસે આઈશર ટેમ્પો ચાલક અજયકુમાર પતારામ થોરીની અટકાયત કરી પૂછપરછ કરતાં આ વિદેશી દારૂનો જથ્થો લુંભારામ પન્નારામ બેનીવાલ અને અનિલભાઈ પાંડ્યાએ ભરાવ્યો હતો. અને પછી રાજકોટ પહોંચી સંપર્ક કરવા જણાવ્યું હતું. પોલીસે ટેમ્પો ચાલક પાસેથી ખોટી બીલટી, એક મોબાઈલ કિંમત રૂપિયા 5,000 અને રોકડા ₹8,000 અને લોખંડનું બોક્સ મળી કુલ રૂપિયા0 81,81,080ની કિંમતનો મુદ્દામાલ જપ્ત કરી બે આરોપીઓને વોન્ટેડ જાહેર કર્યા હતા.
કામગીરી કરનારા પોલીસ અને LCBના અધિકારીઓ:-
પોલીસ ઈન્સ્પેક્ટર ડી.એસ.ગોહિલ
પોલીસ ઈન્સ્પેક્ટર એન.જી. પાંચાણી
પોલીસ ઈન્સ્પેક્ટર એન.એસ. વસાવા
એ.એસ.આઈ જગદીશ, જોરારામભાઈ
એ.એસ.આઈ જયેશભાઈ લીલકીયાભાઈ
હેડ કોન્સ્ટેબલ અનિરૂદ્ધસિંહ દેવસિંહ
પોલીસ કોન્સ્ટેબલ રવિન્દ્રભાઈ મહેન્દ્રભાઈ
પોલીસ કોન્સ્ટેબલ રાહુલભાઈ દિગમ્બરભાઈ
પોલીસ કોન્સ્ટેબલ દિપકભાઈ સેવજીભાઈ
પોલીસ કોન્સ્ટેબલ પ્રકાશભાઈ રામાભાઈ
પોલીસ કોન્સ્ટેબલ સુનીલભાઈ ખુશાલભાઈ
આ તમામ LCB અને તાપી પેરોલ ફર્લો સ્કોર્ડના સ્ટાફે ભેજાબાજ આરોપીને ઝડપી લીધો હતો. મહત્વનું છે કે પોલીસ પકડમાં આવેલો આ શખ્સ છેલ્લાં કેટલા સમયથી આ રીતે દારૂની હેરાફેરી કરતો હતો. તે દિશામાં વધુ તપાસ હાથ ધરવામાં આવી છે.
