ગુજરાતમાં જે રીતે સોમવારે બપોર પછી વરસાદની એન્ટ્રી થઈ તેને જોતા એવું લાગે છે કે, ગુજરાતમાં હવે વિધિવત રીતે ચોમાસાની એન્ટ્રી થઈ ગઈ છે. કારણ કે આ વખતે વરસાદને દક્ષિણ ગુજરાત હોય કે, સૌરાષ્ટ્ર પંથક હોય ચારેબાજુ ધોધમાર વરસ્યો છે. ભારે વરસાદના કારણે રાજ્યની અનેક નદીઓમાં પુરની સ્થિતિ નિર્માણ થવા પામી છે. સોમવારે રાજ્યમાં પડેલા વરસાદની વાત કરીએ તો, રાજ્યનાં 124 તાલુકાઓમાં નોંધપાત્ર વરસાદ નોંધાયો છે. ખાસ કરીને ભાવનગરનાં જેસરમાં સૌથી વધુ એટલે કે, 9.21 ઇંચ વરસાદ ખાબક્યો હતો. જ્યારે ભાવનગરનાં પાલીતાણા અને મહુવામાં 8 ઇંચ જેટલો વરસાદ ખાબક્યો હોવાની માહિતી મળી રહી છે.
રાજ્યમાં ભારે વરસાદની આગાહી:-
હવામાન વિભાગ અને હવામાન શાસ્ત્રીઓ દ્વારા રાજ્યમાં ભારે વરસાદ પડવાની આગાહી કરવામાં આવી છે. ભારે વરસાદની આગાહી ખાસ કરીને સૌરાષ્ટ્ર અને ઉત્તર ગુજરાતમાં ભારેથી અતિ ભારે વરસાદ પડે તેવી શક્યતાઓ હવામાન વિભાગ દ્વારા કરાઈ છે. જ્યારે ગુજરાતના 11 જિલ્લાઓમાં વરસાદનું રેડ એલર્ટ જાહેર કરવામાં આવ્યું છે. તો બીજી તરફ રાજ્યમાં 41થી 61 કિલોમીટરની ઝડપે પવન ફૂંકાવવાની સંભાવના હોવાની હવામાન વિભાગ દ્વારા કરાઈ છે. ખાસ કરીને અમદાવાદ શહેરમાં ગાજવીજ સાથે ભારે વરસાદની આગાહી કરી છે. દક્ષિણ ગુજરાતની વાત કરીએ તો, દક્ષિણ ગુજરાતના તાપી, નવસારી, ડાંગ, સુરત, ભરૂચમાં જિલ્લામાં વરસાદની આગાહી કરવામાં આવી છે.
સૌરાષ્ટ્રમાં વરસાદે ભૂક્કા કાઢ્યા:-
સોમવારે પડેલા વરસાદે સૌરાષ્ટ્રના ખેદાન-મેદાન કરી નાખ્યું છે. કારણે સૌરાષ્ટ્રના મોટાભાગના જિલ્લાઓમાં ધોધમાર વરસાદ વરસ્યો હતો. સૌરાષ્ટ્રના કેટલાક જિલ્લાઓની વાત કરીએ તો, ભાવનગર, અમરેલી, ગીર સોમનાથ, રાજકોટ, જામનગર, અને જૂનાગઢમાં અનરાધાર વરસાદ ખાબક્યો હતો. અમરેલીની વાત કરીએ તો, અમરેલી જિલ્લાના સાવરકુંડલા પંથકમાં અનરાધાર વરસાદ વરસ્યો હતો. જેમાં ખાસ કરીને મેરીયાણા, ગોરડકા, ખડસલી, વીજપડી સહિતના ગામોમાં વરસાદ ખાબક્યો હતો. મેરીયાણાની ફુલઝર નદીમાં ઘોડાપૂરની સ્થિતિ જોવા મળી હતી. અમરેલીમાં સૌથી વધુ વરસાદ સાવરકુંડલા-રાજુલામાં નોંધાયો હતો. જ્યારે સાવરકુંડલામાં 5 ઇંચ અને રાજુલામાં 4 ઇંચ વરસાદ વરસ્યો હતો. ભારે વરસાદના કારણે ખેડૂતોમાં ખુશી જોવા મળી હતી. જ્યારે સતત વરસાદ પડતા કેટલીક જગ્યાએ ખેડૂતો મુશ્કેલીમાં મૂકાયા હોવાની માહિતી પણ મળી રહી છે. કેટલીક જગ્યાએ ખેડૂતોના ઘેટાં બકરા પણ વરસાદી પાણીમાં તણાઈ ગયા હોવાની માહિતી મળી રહી છે.
