હવામાન વિભાગ દ્વારા ગુજરાતમાં વરસાદને લઈ મોટી આગાહી કરવામાં આવી છે. અરબસાગરમાં ડિપ્રેશન સક્રિય થતા ગુજરાતમાં આગામી 4થી 6 દિવસ સુધી વરસાદી માહોલ રહેશે. બે દિવસ સૌરાષ્ટ્ર-દક્ષિણ ગુજરાતમાં અતિભારે વરસાદની આગાહી સાથે ઓરેન્જ અને યલો એલર્ટ આપવામાં આવ્યું છે. દક્ષિણ ગુજરાતના વિવિધ જિલ્લાઓ, સુરત, નવસારી, તાપી, ડાંગ, ભરૂચ જેવા જિલ્લાઓમાં વરસાદ પડવાની આગાહી વ્યક્ત કરવામાં આવી છે. ભારે વરસાદની આગાહી કરતા રાજ્યના ખેડૂતોમાં ચિંતા વધી ગઈ છે. કારણ કે અત્યારે દક્ષિણ ગુજરાતમાં ડાંગર કાપવાની સિઝિન પૂરજોશમાં ચાલી રહી છે. તેવા સમયે વરસાદની આગાહી કરતા ખેડૂતો ચિંતામાં મૂકાય ગયા છે.
સોનગઢ તાલુકાના મોટા ભાગના ખેડૂતોનો પાક પલળી ગયો:-
સોનગઢ તાલુકાના મોટ-ભાગના ગામડાઓમાં ડાંગરની કાપણી ચાલી રહી છે. ખેડૂતોએ ડાંગરની કાપણી કરી પાથરાણા કરી સુકાવવા મૂક્યા છે. તેવા સમયે અચાનક કમોસમી વરસાદ પડતા કાપેલો ડાંગરનો પાક પલળી ગયો છે. જેના કારણે ખેડૂતોના મોંઢામાં આવેલો કળિયો ફરી એકવાર છીનવાઈ ગયો છે. ખેડૂતોએ તડકો નિકળશે તેવી આશાએ ડાંગરનો પાક કાપી સૂકાવવા મૂક્યો હતો. પરંતુ તડકાની જગ્યાએ કમોસમી વરસાદ પડતા ડાંગરના પાકને નુકસાન થયું છે.
ડાંગરનો પાક પડી જતા ખેડૂતોનો મુશ્કેલી:-
મોટાભાગના ગ્રામીણ વિસ્તારમાં અત્યારે ડાંગર કાપવાની સિઝન ચાલી રહી છે તેવા સમયે અચાનક કમોસમી વરસાદ અને પવન ફૂકાતા ડાંગરનો પાક ખેતરમાં જ પડી ગયો છે. ડાંગરનો પાક ખેતરમાં ઢળી પડ્યો હતો. તેમાં હવે વરસાદ પડી જતા સમગ્ર ડાંગરનો પાક બગડવાની પૂરી શક્યતા છે. અથવા પાક સડી જવાની પૂરી શક્યતા છે. આ ઉપરાંત ડાંગરના ચોખા પણ કાળા પડી જતા હોવાથી વેચવા સમયે પણ યોગ્ય ભાવ નથી મળતા તેમજ આ ડાંગરના ચોખા ખાવામાં પણ મજા આવતી નથી. આમ અત્યારે દક્ષિણ ગુજરાતના ખેડૂતોના માથે આભ તૂટી પડ્યું હોય તેવો ઘાટ ઘડાય રહ્યો છે.
સરકાર પાસે વળતરની માગ:-
ખેડૂતોએ આખું વર્ષ મહેનત કરી ડાંગરનો પાક તૈયાર કર્યો હતો. પરંતુ અચાનક કમોસમી વરસાદ આવતા ખેડૂતોનો ડાંગરનો પાક બગડી ગયો છે. જેને લઈને ખેડૂતોએ સરકાર પાસે વળતરની માંગ કરી છે. ખેડૂતોએ કાપીને મૂકેલો ડાંગરના પાકમાં પાણી ભરાઈ જતા મોટું નુકસાન વેઠવાનો વારો આવ્યો છે.
