ગુજરાતમાં વરસાદી માહોલ જોરદાર બનવાની આગાહી સાથે મેઘરાજાએ રાજ્યના વિવિધ વિસ્તારોમાં ધોધમાર વરસાદની તૈયારી શરૂ કરી દીધી છે. જાણીતા હવામાન નિષ્ણાત અંબાલાલ પટેલે આપેલી આગાહી અનુસાર, ૪ અને ૫ જુલાઈના રોજ અમદાવાદ અને ગાંધીનગરમાં ભારે વરસાદ પડવાની સંભાવના છે. આ બંને મહાનગરોમાં વરસાદની તીવ્રતા એટલી વધુ હોઈ શકે કે નીચાણવાળા વિસ્તારોમાં પાણી ભરાઈ જવાની સ્થિતિ સર્જાઈ શકે છે. જેના કારણે વાહનવ્યવહાર અને રોજિંદા જીવન પર તેની અસર પડવાની શક્યતા છે.
ગુજરાતના આ જિલ્લાઓ ધોધમાર વરસાદની આગાહી
અંબાલાલ પટેલની આગાહી મુજબ વડોદરા, ભરૂચ, મહીસાગર અને સુરત જિલ્લામાં પણ ધોધમાર વરસાદની આગાહી કરવામાં આવી છે. આ વિસ્તારોમાં વરસાદની તીવ્રતા વધુ હોઈ શકે છે. તેમજ પાટણ, બનાસકાંઠા, અરવલ્લી અને પંચમહાલ જિલ્લાઓમાં પણ વરસાદ પડવાની સંભાવના છે. નીચાણવાળા વિસ્તારો, ગામડાઓ અને શહેરી વસ્તીમાં પાણી જામવાની સમસ્યા ઊભી થઈ શકે છે. તેથી લોકોને સતર્ક રહેવાની સલાહ આપવામાં આવી છે.
મધ્યપ્રદેશમાં વરસાદના કારણે નર્મદા ડેમમાં પાણી વધશે
ધોધમાર વરસાદના પરિણામે રાજ્યની નદીઓમાં પૂર આવવાની આગાહી પણ છે. અનેક નાની-મોટી નદીઓમાં પાણીનું સ્તર વધવાથી પૂરની સ્થિતિ સર્જાઈ શકે છે. ખાસ કરીને નર્મદા અને તેની શાખા નદીઓમાં પાણીની આવક વધી શકે છે. મધ્યપ્રદેશમાં થઈ રહેલા ભારે વરસાદને કારણે નર્મદા ડેમમાં પાણીની આવક વધવાની સંભાવના છે, જેની અસર ગુજરાતના નીચાણવાળા વિસ્તારો પર પડી શકે છે.
આગામી દિવસોમાં વરસાદનો જોર વધશે: અંબાલાલ પટેલ
આગામી દિવસોમાં વરસાદનું જોર વધુ વધવાની શક્યતા છે. ૮ જુલાઈના રોજ બંગાળના ઉપસાગરમાં એક સિસ્ટમ સક્રિય થવાની આગાહી છે. આ સિસ્ટમના કારણે રાજ્યના અનેક વિસ્તારોમાં સતત ધોધમાર વરસાદ પડી શકે છે. ખેડૂતો માટે આ સારા સમાચાર છે, પરંતુ શહેરી વિસ્તારો અને નદીકિનારાના વસવાટો માટે જોખમી સ્થિતિ પેદા થઈ શકે છે.લોકોને સલાહ આપવામાં આવે છે કે તેઓ વરસાદ દરમિયાન નદીકિનારે ન જાય, નીચાણવાળા વિસ્તારોમાં સાવધાની રાખે અને સરકારી સૂચનાઓનું પાલન કરે. વરસાદના કારણે વીજળી પડવાની ઘટનાઓ પણ વધી શકે છે, તેથી વીજળીના સાધનો અને ખુલ્લા વિસ્તારોમાં રહેવાથી બચવું જરૂરી છે.
આ વરસાદી માહોલ ગુજરાતના કૃષિ અને જળસંગ્રહ માટે ફાયદાકારક સાબિત થઈ શકે છે, પરંતુ વહેલી તકે તૈયારીઓ કરવી જરૂરી છે જેથી કોઈ અનુચિત ઘટના ન બને. અંબાલાલ પટેલની આગાહી અનુસાર આગામી દિવસોમાં રાજ્યમાં વરસાદનું જોર વધુ તીવ્ર બનવાની ધારણા છે.
