પૂર્વ વનમંત્રી મોહનસિંહ છોટુભાઈ રાઠવાનું દુઃખદ અવસાન છોટાઉદેપુરના દિગ્ગજ આદિવાસી નેતા, ગુજરાતના પૂર્વ વનમંત્રી અને ૧૦ વખતના ધારાસભ્ય મોહનસિંહ છોટુભાઈ રાઠવાનું ૮૨ વર્ષની વયે લાંબી બીમારી બાદ નિધન થયું છે. આદિવાસી સમાજ અને રાજકીય જગતમાં શોકની લહેર છવાઈ ગઈ છે. છોટાઉદેપુર માટે તેમનું અવસાન અપૂર્ણીય ખોટ છે. તેમના પુત્ર રાજેન્દ્રસિંહ રાઠવા હાલ છોટાઉદેપુર વિધાનસભા ક્ષેત્રના ધારાસભ્ય છે.
મોહનસિંહ રાઠવાનો જન્મ ૪ એપ્રિલ ૧૯૪૪ના રોજ પાવી જેતપુર તાલુકાના બાર ગામે એક સામાન્ય ગરીબ કુટુંબમાં છોટુભાઈ રાઠવા અને સંજુબેનના ઘરે થયો હતો. માતા-પિતાની મહેનતથી તેઓ અભ્યાસમાં તેજસ્વી સાબિત થયા. તેમણે ૧૯૬૪માં ગુજરાત માધ્યમિક શાળામાંથી SSC (૧૦મું પાસ) પૂર્ણ કર્યું. અભ્યાસ પછી તેઓ ફોરેસ્ટર, શિક્ષક અને PSI જેવી સરકારી નોકરીઓમાં સફળતાપૂર્વક પસાર થયા, પરંતુ કાકા ગમજીભાઈ રાઠવાના પ્રેરણાથી નોકરી છોડીને સર્વોદય યોજના દ્વારા સમાજસેવામાં જોડાયા.
સરપંચથી લઈ રાજ્યકક્ષા સુધીની સફર
૧૯૬૬માં તેઓ પ્રથમ વખત બાર ગામના સરપંચ તરીકે ચૂંટાયા. ૧૯૭૨માં પાવી-જેતપુરથી પ્રથમ વખત ધારાસભ્ય બન્યા. ૧૯૭૫માં તેમણે તત્કાલીન મુખ્યમંત્રી ચિમનભાઈ પટેલને હરાવીને રાજકીય દિગ્ગજ તરીકે ઉભરી આવ્યા. ૧૯૭૨થી ૨૦૦૨ (કેટલાક અપવાદ સાથે) અને પછી ૨૦૦૭, ૨૦૧૨ વગેરેમાં તેઓ વારંવાર વિજયી બન્યા. ગુજરાતમાં સૌથી વધુ વખત ધારાસભ્ય બનવાનો રેકોર્ડ તેમના નામે છે. તેઓ જનતા પાર્ટી, જનતા દળ અને મુખ્યત્વે કોંગ્રેસ સાથે જોડાયેલા રહ્યા. ૨૦૨૨માં તેઓ પુત્રો સાથે ભાજપમાં જોડાયા હતા.
ગુજરાત સરકારમાં વિરોધપક્ષના નેતા પણ રહ્યા હતા
તેમની રાજકીય સફરમાં તેઓ વનમંત્રી તરીકે સેવા આપી ચૂક્યા હતા અને કેબિનેટ મંત્રી તથા વિરોધપક્ષના નેતા પણ રહ્યા. આદિવાસી વિસ્તારના વિકાસમાં તેમનું યોગદાન અમૂલ્ય છે. જંગલી જમીનો ખેડનાર ખેડૂતોને ૧૦ એકર જમીન આપવા, સુખી ડેમનું નિર્માણ, નદીઓ પર પુલો, સિંચાઈ યોજનાઓ, આર્ટ્સ-કોમર્સ કોલેજો અને છાત્રાલયોની સ્થાપના જેવા અનેક કાર્યો તેમના નામે છે. આદિવાસી યુવાનોને શિક્ષણની તકો આપીને તેમણે વિસ્તારને આગળ વધાર્યો. ૨૦૧૯માં તેઓ ગુજરાતના શ્રેષ્ઠ ધારાસભ્ય તરીકે પણ સન્માનિત થયા હતા.
પત્ની કમળાબેન સાથે તેમનું સુખી કુટુંબ છે. પુત્રો રણજીતસિંહ, રાજેન્દ્રસિંહ (રાજુભાઈ), જિતેન્દ્ર અને પુત્રી ચંદ્રિકાબેન. તેમના પુત્રો હાલ ભાજપમાં સક્રિય છે અને પરિવારની સેવા પરંપરા ચાલુ રાખી છે. મોહનસિંહ રાઠવા આદિવાસી સમાજના અગ્રણી નેતા તરીકે યાદ રહેશે, જેમણે સંઘર્ષમાંથી ઉઠીને વિકાસ અને સેવાનો માર્ગ બતાવ્યો. તેમના અવસાનથી છોટાઉદેપુર અને ગુજરાતે એક અનુભવી, સમર્પિત નેતાને ગુમાવ્યો છે.
